Mon, 22 Jul 2019

Cebuano News: Manaba River, ikatulo sa labi'ng limpyong suba sa nasud

Philippine Information Agency
24 Jun 2019, 13:38 GMT+10

TAGBILARAN CITY, June 20 (PIA)--Napili ang Manaba River sa lungsod sa Garcia Hernandez ning lalawigan sa Bohol isip ikatulo sa pinakalimpyo nga suba sa tibuok nasud.

Kini human mi arang-arang ang kalidad sa tubig sa maong suba sa mga milabay nga mga buwan pinaagi sa labing-unang programa sa Department of Environment and Natural Resources (DENR) nga Recognizing Individuals/Institutions Towards Vibrant and Enhanced Rivers (RIVERS) for Life Award.

Mismong si DENR Kalihim Roy Cimatu ang nitunol sa award ngadto sa mga opisyal sa Bohol Provincial Environment and Natural Resources Office (PENRO) atol sa kasaulogan sa ika-32 nga anibersaryo sa ilang nasudnong buhatan didto sa syudad sa Quezon niadtong Hunyo 14.

Si Cimatu miingon nga kining inisyatiba parte sa paningkamot sa DENR sa pagpasaka sa 'public awareness' sa panginahanglan sa pagpanalipod ug pagkonserbar sa mga suba sa nasud isip 'lifeblood' sa kalibotan.

Napili isip pinakalimpyong suba ang Lamut River sa probinsiya sa Ifugao, Cordillera Administrative Region samtang ikaduha ang Calbayog River sa probinsiya sa Samar sa Rehiyon 8.

Nakadawat og ganting salapi nga nagkantidad og P100,000, P75,000 ug P50,000 ang mga napiling nag-una, ikaduha ug ang ikatulo nga pinakalimpyong suba sa tibuok nasud.

Ang pagpili sa mga suba gihimo sa DENR Regional Committee nga naglangkob sa DENR Mines and Geosciences Bureau (MGB) ug Environmental Management Bureau (EMB).

Ang mga entries gisubli base sa listahan sa mga aktibidad ug pagdumala nga gihimo sa mga hingtungdang PENROs ug CENROs sa ilang mga nominadong suba.

Ang ubang suba dinhi sa lalawigan nga nahinlo pinaagi sa proyektong RIVERS of Life mao ang Abatan River sa lungsod sa Cortes ug ang Inabanga River sa lungsod sa Inabanga. (ecb/PIA7-Bohol)

Sign up for Honduras News

a daily newsletter full of things to discuss over drinks.and the great thing is that it's on the house!